Tings An' Times lyrics

now watchta mistah man
mi noh like di way yu tan
an yu tan soh too lang yu know man
a meditate yu a meditate pan di same sang soh lang ?
well hear mi man :

mi naw preach
mi naw teach
mi jusa show yu
ow mi seit
caw di trute well sweet
jus like a African beat
like wen yu si whey yu comin fram
like wen yu site whichpawt yu reach

Sowshallism
is a wise ole shephad
im suvvie tru flood
tru drout
tru blizad

somme people seh
im a two hundred an odd years ole
addah people seh
notn noh goh soh
dat im a jus seventy odd years ole
some seh im is a ghost
some seh im is a sage
but nohbady noh really know
im riteful age ar whey im come fram

fateful is im flock

mi revalueshanary fren is nat di same agen
yu know fram wen ?

fram di masses shata silence
staat fi grumble
fram pawty paramoncy tek a tumble
fram Hungary to Poelan to Romania
fram di cozy cyassle dem staat fi crumble
wen wi buck-up wananada in a reaznin
mi fren always en up pan di same ting
dis is di sang im love fi sing :

Kaydar
e ad to go

di innocent an di fool could paas fi twin
but haas a haas
an mule a mule
mawgah mean mawgah
it noh mean slim
yet di two a dem in common share someting
dem is awftin confused an get used
dem is awftin criticised an campramised
dem is awftin villified an reviled
dem is awftin foun guilty widoutn being tried
wan ting set di two a dem far apawt dow

wance upon a time
jus like inna nursery rime
before piggy tun swine
mi did wear
mi fear
pan mi face
like a shiel
like a mawsk
an evrybody tink mi cool an deadly

nottn yu coulda seh
woulda mek mi tek it awf
an if yu get mi nervos
ah voulda jus lawf it awf
an evrybody tink mi cool an deadly

but not soh long ago

duped
doped
demoralised
dizzied
dozed
traumatized

blinded by resplendent lite of love
dazzled by di firmament of freedom
im couldn deteck deceit
all wen it kick im in im teet
im couldn cry khorupshon
an believe inna man
im nevvah know bout cleek
im did umble an meek
im nevvah know intrigue
im nevvah inna dat deh league